Palumbares

Las sues ourígenes son remotas i las oupeniones de ls studiosos son diferentes acerca de las razones que motibórun ua tan lharga difuson, indas que las formas arquitectónicas, an ferradura ou planta circular, sugíran raízes castrejas.
Drento de l Parque Natural de l Douro Anternacional, ls palumbares mais antigos remóntan a meados de l seclo XIX, tenendo la grande maiorie sido cunstruída na purmeira metade de l seclo XX. An ne sou anterior eisísten einúmeras cabidades an piedra, que proporciónan l habitat de nidificaçon pa ls palombos.

La permanéncia de ls mesmos ye fumentada pu ls proprietários que alhá pónen de comer i determinadas yerbas de cheiro.
Desta forma ls palumbares permitien la produçon de carne (palumbicos) i de stierco (pombinho), cunstituindo un complemento a la actividade agro-pecuária de ls sous proprietários.

Onde ouserbar palumbares tradicionales: an todo l Praino Mirandés, prancipalmente an Freixenosa, Fuonte Aldé, Cérceno, Malhadas, Eifainç, Sendin i Picuote.